Msuva ampa Tambwe kiatu cha dhahabu

NA ZAINAB IDDY
LICHA ya mshambuliaji wa Simba, Hamis Kiiza, kuongoza katika mbio za ufungaji bora, mfungaji bora wa msimu uliopita, Simon Msuva wa Yanga, amesema kwamba Mrundi, Amis Tambwe, ndiye atakayeibuka mfungaji bora msimu huu.
Msuva amelisema kwamba, licha ya Tambwe kupata upinzani mkali kutoka kwa Kiiza, lakini ana nafasi kubwa ya kupata tuzo hiyo msimu huu kutokana na uwezo wake wa kupachika mabao.
 “Najua upinzani katika mbio hizo za ufungaji bora ni mkubwa lakini kwangu mimi nampa nafasi kubwa Tambwe kwani anao uwezo mkubwa wa kutumia nafasi anazozipata,” alisema Msuva.
Tambwe ambaye msimu wa 2013/14 aliibuka mfungaji bora akiwa na mabao 17 wakati huo akiichezea Simba, kwa sasa ana mabao 17, nyuma ya Kiiza mwenye mabao 19.
Katika msimu uliopita, Msuva alifanikiwa kutwaa tuzo ya ufungaji bora baada ya kuifungia timu yake jumla ya mabao 17 akifuatiwa na Tambwe aliyetikisa nyavu mara 15.

Azam macho yote kwa Prisons kesho

NA SALMA MPELI
UONGOZI wa timu ya Azam FC umesema kuwa kwa sasa macho yao yote yapo kwa Tanzania Prisons ambao wanatarajia kukutana nao kesho ikiwa ni mechi ya Kombe la Shirikisho (FA) mchezo utakaopigwa kwenye Uwanja wa Azam Complex, Chamazi.

Akizungumza na DIMBA, Ofisa Habari wa Azam, Jafari Idd, alisema hiyo ndiyo mechi iliyoko mbele yao kwa sasa kabla ya ile ya ligi dhidi ya Toto African ya Mwanza, Aprili 3 kabla ya kukutana na Esperance ya Tunisia kwenye Kombe la Shirikisho.
“Tunajiandaa kuhakikisha tunaibuka na ushindi ili kuingia hatua ya nusu fainali, tunashukuru kikosi chetu kimekamilika baada ya wachezaji wa timu ya Taifa kurejea na kujiunga kambini pamoja na wenzao,” alisema Jaffer.
Katika msimamo wa Ligi Kuu Azam wapo nafasi ya tatu wakiwa na pointi 50 sawa na Yanga huku zikitofautiana idadi ya mabao ya kufunga na kufungwa.

African Sports kusaka kocha Zanzibar

NA SALMA MPELI
UONGOZI wa African Sports ya Tanga upo katika harakati ya kumsaka kocha kutoka visiwani Zanzibar atakayeziba nafasi ya Ramadhan Aluko aliyefukuzwa hivi karibuni.
Akizungumza na DIMBA, Makamu Mwenyekiti wa timu hiyo, Abdul Bosnia, alisema wanahitaji kocha kwa haraka na tayari wapo katika mchakato huo kwa ajili ya kuanza kazi mapema ili kuinusuru timu kutoka kwenye hatari ya kushuka daraja.
“Tunahitaji kocha kwa haraka baada ya kuamua kuachana na Aluko, tumelenga kutafuta mwalimu kutoka Unguja ili aanze kazi mapema,” alisema.
African Sports ipo nafasi ya 15 kwenye msimamo wa ligi hiyo ikiwa na jumla ya pointi 20 juu ya ndugu zao Coastal Union ambao wanaburuza mkia wakiwa na pointi 19 ambapo timu hizo zote zipo kwenye hatari ya kushuka daraja.
Timu hiyo ilipanda daraja msimu uliopita na kuanza kucheza Ligi Kuu msimu huu baada ya kucheza ligi hiyo kwa mara ya mwisho mwaka 1988, lakini hata hivyo mashabiki wao wana wasiwasi mkubwa kutokana na majaliwa na timu hiyo katika msimu ujao wa ligi kwani huenda isiwepo msimu ujao.

Manara: Al Ahly iifunge Yanga 5-0

NA EZEKIEL TENDWA
UNAKUMBUKA yale mabao 5-0 ambayo Simba waliwafunga Yanga msimu wa 2012? Sasa ni hivi, msemaji wa Wanamsimbazi hao, Haji Manara, amesema anataka Al Ahly iibuke na ushindi kama huo dhidi ya Wanajangwani hao Jumamosi ya Aprili 9.
Unajua kwanini Manara ameamua kutamka maneno hayo? Jibu ni jepesi tu kwamba kama Yanga wataibuka na ushindi dhidi ya Al Ahly katika Uwanja wa Taifa, Dar es Salaam jiji halitakalika.
“Nataka Yanga ifungwe mabao 5-0 kama tuliowafunga sisi mwaka 2012 kwani hawa Yanga wakishinda mji hautakalika. Nadhani ikiwa hivi mambo yatakuwa sawa sawa na mji utakalika na kahawa itanyweka,” alisema Manara mtoto wa nyota wa zamani wa Yanga, Sunday Mnara ‘Computer’.
Yanga na Al Ahly zinatarajiwa kukutana Aprili 9 mwaka huu kwenye Uwanja wa Taifa jijini Dar es Salaam, mchezo wa mabingwa barani Afrika.

Kiungo Simba aitahadharisha Yanga

NA ZAINAB IDDY
KIUNGO wa zamani wa Simba, Pierre Kwizera, amesikia kuwa Yanga watakabiliana na Al Ahly ya Misri katika michuano ya Ligi ya Mabingwa Afrika na sasa ameamua kuwapa somo kwamba wanatakiwa waingie kwa tahadhari kubwa.
Kwizera ambaye kwa sasa anakipiga katika Klabu ya Rayon Sports ya nchini Rwanda, amesema kama kweli Yanga wana nia ya kufanya vizuri dhidi ya Al Ahly ni lazima wajipange kisawasawa kukabiliana na mbinu chafu za ndani na nje ya uwanja.
“Ukikutana na timu za Kiarabu unatakiwa uwe fiti kuanzia akili kwani jamaa wanajua kutumia viwanja vyao vya nyumbani tofauti na ukanda wetu wa Afrika Mashariki na Kati.
“Kama kweli Yanga wana nia ya kuwatoa lazima wahakikishe wanaibuka na ushindi usiopungua angalau mabao 4-0, kwani vinginevyo itawawia vigumu watakapokwenda Misri wakiwa ugenini,” alisema Kwizera.
Mchezo wa Yanga dhidi ya Al Ahly unatarajia kuchezwa Aprili 9 mwaka huu katika Uwanja wa Taifa jijini Dar es Salaam, huku ule wa marudiano ukitaraji kuchezwa Aprili 19 nchini Misri.

TANGAZO LA KAZI

KAMPUNI ya Wazalendo Bright Media   inatangaza nafasi ya kazi ya afisa masoko kwa  Watanzania wote.

Sifa:
1. Awe ni Mtanzania
2. Umri miaka 20-40
3. Awe na elimu ya masuala ya biashara kwa    kiwango cha Diploma kutoka  chuo               kinachotambulika.
4. Awe na uzoefu wa miaka mitatu kwa kazi anayoomba.
5. Awe na uwezo wa kuzungumza lugha ya Kiswahili na Kiingereza, anayejua lugha ya     Kifaransa, Kiarabu     itakuwa ni sifa za ziada.
6. Asifanye kazi kwa kusukumwa na awe mbunifu.
7. Awe tayari kufanya kazi popote ndani ya  Jamhuri ya Muungano wa Tanzania kulingana na atakavyopangiwa na mkuu wake wa kazi.

Barua zote zitumwe kwa:
Afisa Mtendaji Mkuu,
Wazalendo Bright Media,
Dar es Salaam,
Tanzania.
Barua zitumwe kwa njia ya Email:
mchakarikajitv@gmail.com
nellymtanzania@gmail.com

Martha Nelson anogewa na muziki wa injili

MWIMBAJI wa nyimbo za injili na mcheza filamu za Bongo, Martha Nelson, ni moja ya waimbaji wa muziki huo ambao wanafanya vizuri katika tasnia hiyo kwa sasa.

Martha mama wa watoto watatu, licha ya kufanya vizuri Afrika Mashariki kwenye muziki wa injili, lakini amekuwa akipata nafasi za kuitangaza nchi katika maeneo mengine nje ya Afrika ikiwemo Ulaya na Marekani.

Mwanamama huyu anasema kwamba, muziki wa injili umekuwa ni kimbilio na kielelezo cha kumfanya atambulike kuwa ni Mtanzania popote anapokuwa anakwenda, hasa kwa sababu kazi zake zote amekuwa akitumia lugha ya Kiswahili.

Martha anasema ili kufanikiwa kwenye muziki wa injili  lazima ufuate miiko inayoongoza muziki huo nayo ni ukweli pamoja na kumshirikisha Mungu. Lakini lingine kuhakikisha kazi inayofanyika ni bora ambayo inaweza kukubalika ndani na nje Tanzania.

“Kazi ya muziki wa injili ni ngumu lakini ukimtegemea Mungu ni jambo linalowezekana kufanikiwa. Lakini kubwa kuliko yote ni kujua unatakiwa kufanya nini kwa ajili ya nani.

“Kwa mfano katika kazi yangu mpya iitwayo ‘Yupo Mungu Asiyeshindwa’ niliweza kumshirikisha Mungu kwa kiwango kikubwa naamini ndiyo sababu ya kazi hiyo kufanya vizuri kwa wakati huu.

“Naelewa kuwa si jambo rahisi lakini niseme kwamba muziki huu bado unahitaji nguvu ya ziada kuhakikisha unakuwa na kupaa zaidi ya ilivyo sasa kwa sababu inawezekana kwani tunayemtumikia ni mkuu zaidi ya yeyote,” anasema Martha.

Mwimbaji huyo anasema katika kazi hiyo mpya ina jumla ya nyimbo nane ambapo kwa sasa imeshatoka ingawa sokoni itaingia katikati ya Februari. Baadhi ya nyimbo zilizozopo kwenye albamu hiyo ni pamoja na Usifiwe Jehova, Amenitoa Mbali, Acheni Niimbe na nyingine nyingi.

“Kazi hii natarajia itaingia sokoni katikati ya Februari ili mashabiki wangu waweze kuniunga mkono, ingawa kubwa kuliko yote ni kuhakikisha ujumbe wangu wa Neno la Mungu unawafikia watu wote.

Hii ni albamu ya pili kwa Martha ambapo ya kwanza aliitoa miaka mitano iliyopita iliyokwenda kwa jina la Unawaza Nini.

“Baada ya kutoa albamu yangu ya kwanza nilikaa zaidi ya miaka miwili nikiandaa kazi mpya, lakini baadaye nilikaa tena miaka hadi kuingia studio na kurekodi video. Kwa lugha rahisi ni kwamba, kazi hii nimeifanya kwa muda wa miaka mitano.

“Sababu kubwa zilizonifanya kuamua kuchukua muda mrefu katika kazi moja ni kutokana na kutafuta ubora, unapotaka kufanya kitu bora lazima ufanye kwa umakini lakini kitu chenye uhakika, mimi nilifanya hivyo kwa kuamini kwamba ninaweza kufanya kitu bora hasa ikizingatiwa kuwa hii ni kazi ya Mungu lazima iwe bora,” alisisitiza nyota huyo.

Mbali na kufanya vizuri kwenye muziki, lakini katika tasnia ya filamu amefanya kazi nyingi ikiwemo Poster Shadow, Haki, Tutafika pamoja na nyingine nyingi. Juu ya sekta hiyo, Martha ameishauri Serikali kuhakikisha kuwa inaisimamia sekta ya filamu vizuri pamoja na sanaa kwa ujumla ili kuzalisha ajira nyingi zaidi.

“Tunahitaji sanaa iwe ni kazi rasmi ambayo inaweza kusimamia maendeleo ya uchumi kikamilifu. Naamini kuwa kwa kutumia njia hii itasaidia katika mapambano dhidi ya umasikini,” amesisitiza mkali huyo wa injili. 

Martha Nelson katika picha mbalimbali.