Kiongozi wa mashtaka Argentina auawa

Kiongozi maarufu wa mashtaka nchini Argentine amepatikana amefariki ndani ya nyumba yake mjini Buenos Aires, baada ya kumshutumu Rais Cristina Fernandez kwa kuzuia uchunguzi wa mashambulio mabaya zaidi ya ugaidi kuwahi kufanyika nchini humo.

Alberto Nisman (pichani) alikuwa amepangiwa kutoa maelezo ya kina kwa bunge la taifa hilo.

Alikuwa akisimamia uchunguzi kuhusiana na mlipuko katika kituo kimoja cha kijamii kilichokuwa kikisimamiwa na wayahudi mjini Buenos miaka 20 iliyopita ambapo watu watano waliuwawa.

Juma lililopita bwana Nisman alimshutumu Rais Fernandez na wakuu wengine kwa kuzuia uchunguzi huo.

Mapinduzi yanukia Gambia, Rais asisema bado yupo madarakani

Rais wa Gambia amesema kuwa bado analiongoza taifa hilo la Afrika magharibi baada ya vikosi vyake vya usalama kutibua jaribio la mapinduzi.

Yahya Jammeh amesema kuwa kamanda mmoja wa jeshi wa zamani alijaribu kuchukua udhibiti wa taifa hilo alipokuwa ziarani Ufaransa.
Hatahivyo hajulikani aliko ingawa milio mikali ya risasi ilizuka karibu na makao ya Rais katika mji mkuu.
Bwana Jammeh alichukua mamlaka kupitia mapinduzi mwaka 1994 na wapinzani wake wamekuwa wakimkosoa kwa uongozi wake wa kiimla.
Duru za kidiplomasia na zile za kijeshi zinasema kuwa wanajeshi kutoka kwa jeshi la ulinzi wa rais wanadaiwa kufanya shambulizi hilo katika makao ya rais mjini Banjul mapema siku ya jummane.
Serikali imekana kwamba kulikuwa na jaribio la mapinduzi katika taarifa iliotangazwa katika radio ya taifa.
Hatahivyo,bwana Jammeh baadaye alikiri kuhusu shambulizi hilo na kusema kuwa wanajeshi waaminifu wa Lamin Sanneh aliyemtaja kama mwenye aibu walivamia mji mkuu wa Gambia kutoka Senegal katika jaribio la kutaka kuipindua serikali yake.
Amesema kuwa wavamizi hao hatahivyo walikabiliwa na vikosi vya usalama na kuwaua wanne kati yao huku wengine wanne zaidi wakikamatwa.

Sikinde, Kopa kuwasha moto Swahili Arts Carnival

NA MWANDISHI WETU

BENDI Kongwe ya muziki wa dansi, Sikinde pamoja na Malkia wa muziki wa Taarab Afrika Mashariki, Khadija Kopa ni miongoni mwa wanamuziki watakatoa burudani kwenye Tamasha la Sanaa na Ubunifu wa Mswahili (Swahili Arts and Creative Carnival).

Akizungumza na mtandao wa jamii,  mmoja wa waratibu wa tamasha hilo, Ahadi Kakore amesema kuwa Sikinde ni miongoni mwa bendi zinazopiga muziki wa Kiswahili asilia ndiyo maana wameamua kuiweka kuwa bendi rasmi ya dansi ya tamasha hilo.

Aliongeza kuwa kwa upande wa Khadija Kopa naye atakuwa na bendi yake ya Ogopa Kopa Classic ambayo siku hiyo imeahidi kuimba nyimbo zake mpya ambazo nyingi zitaimbwa kwa mara ya kwanza siku hiyo.

“Mbali ya kuwepo kwa burudani hizo za muziki lakini haina maana kuwa ndiyo tumefunga mlango kwamba hatutakuwa na wasanii wengine ila bado tupo kwenye mazungumzo na wanamuziki nyota wa kizazi kipya kwani tumelenga kuwafikia watu wa rika zote.

“Pamoja na burudani za watu wazima pia watoto nao hawajaachwa nyuma kwa sababu kutakuwa na michezo maalum kwa watoto na zawadi nyingi zipo kwa ajili yao ili kuhakikisha wanafurahia siku hiyo.

Mbali na muziki, burudani nyingine zitakazokuwepo siku hiyo ni maonyesho ya filamu za Kiswahili, maonyesho ya mavazi, vyakula, nyama choma, vinywaji pamoja na michezo ya watoto na maonyesho ya bidhaa za wajasiriamali na watu 1,000 wa kwanza watapata zawadi langoni,” alisema Kakore.

Swahili Arts and Creative Carnival linatarajiwa litafanyika Novemba 29 mwaka huu kwenye viwanja vya Posta, Kijitonyama jijini Dar es Salaam huku likiwalenga watu wazima na watoto kuanzia saa 4:00 asubihi hadi usiku wa manane.

Tamasha hilo limeandaliwa na Kampuni ya Swahili Arts & Creative Carnival kwa kushirikiana na Hildelly Solution na Wazalendo Bright Media kwa udhamini wa Amo Transport Solutions, Coca Cola, Tigo, Oriflem, Chibuku, Global Publishers, CTN na Sibuka TV. 

IGP MANGU AONGEZA ASKARI KITETO

Mkuu wa Jeshi la Polisi Nchini,IGP Ernest Mangu akimsikiliza Diwani wa Kata ya Matui Wilayani Kiteto Bw.Athuman Kidawa wakati alipofanya ziara wilayani humo kufuatia kuwepo kwa migogoro ya ardhi baina ya wakulima na wafugaji iliyosababisha kutokea mapigano yaliyosababisha kutokea kwa  vifo.kushoto ni Afisa tarafa wa Matui Bw.Eliakimu Ndelekwa.(Picha na Frank Geofray-Jeshi la Polisi)

Mkuu wa Jeshi la Polisi Nchini,IGP Ernest Mangu akizungumza na wananchi  wa Kata ya Matui Wilayani Kiteto wakati alipofanya ziara wilayani humo kufuatia kuwepo kwa migogoro ya ardhi baina ya wakulima na wafugaji iliyosababisha kutokea mapigano yaliyosababisha kutokea kwa  vifo. (Picha na Frank Geofray-Jeshi la Polisi)

Mkuu wa Jeshi la Polisi Nchini,IGP Ernest Mangu akizungumza na Mtendaji wa Kijiji cha Chekanao, Kata ya Kiperesa , Wilayani Kiteto Bw.Omar Ndee (kulia) wakati alipofanya ziara wilayani humo kufuatia kuwepo kwa migogoro ya ardhi baina ya wakulima na wafugaji iliyosababisha kutokea mapigano yaliyosababisha kutokea kwa vifo.Katikati ni Kamanda wa Polisi Mkoa wa Manyara, Deusdedit Nsimike pamoja na Mwenyekiti wa Kijiji hicho Bw.Japhet Chafu (Picha na Frank Geofray-Jeshi la Polisi)

Na Frank Geofray-Jeshi la Polisi, Kiteto.

Mkuu wa Jeshi la Polisi Nchini IGP Ernest Mangu ameahidi kuongeza idadi ya Askari katika kijiji cha Chekanao, kata ya Kiperesa wilayani Kiteto Mkoani Manyara kufuatia wananchi katika kijiji hicho kujitolea nyumba kwa ajili ya kuishi Askari kwa lengo la kuimarisha usalama katika maeneo yao kufuatia kuwepo kwa migogoro ya ardhi inayosababisha kutokea kwa mauaji.

IGP Mangu aliyasema hayo jana wakati alipokuwa katika ziara Wilayani Kiteto ya kujionea uharibifu uliojitokeza pamoja na kutafuta ufumbuzi wa migogoro hiyo iliyopelekea kutokea kwa vifo vya wakulima na wafugaji hivi karibuni katika wilaya hiyo ambapo watu kadhaa wanashikiliwa na Jeshi la Polisi kutokana na vurugu hizo.

Alisema kufuatia kuwepo kwa umbali mrefu wa kituo cha Polisi na kijiji hicho atahakikisha askari wa kudumu wanakuwepo ili kushirikiana na wananchi katika kuwabaini wahalifu wanaofanya vurugu na kuendeleza migogoro hiyo ambapo wananchi nao waliahidi kujenga kituo cha Polisi.

Kwa upande wake Mtendaji wa Kijiji cha Chekanao Bw.Omar Ndee alisema wamekuwa wakipata shida kutokana na umbali mrefu wa kituo cha Polisi jambo ambalo limekuwa likifanya kuongezeka kwa vitendo vya uhalifu vinavyochangiwa na migogoro ya ardhi katika wilaya ya Kiteto.

Naye Mwenyekiti wa Kijiji hicho Japhet Chafu alilishukuru Jeshi la Polisi kwa kuimarisha usalama kijijini hapo tangu kutokea kwa mauji ya wakulima na wafungaji ambapo alibainisha kuwa bila kuwepo wao hali ingekuwa mbaya zaidi kutokana na kutokuwepo na muafaka baina ya wakulima na wafugaji.

“IGP hawa askari wako wasingekuwepo hapa usingekuta mtu lakini tunawashukuru sana hawa askari kwa kuwa hivi sasa hali ya usalama imerejea na hata shambani tumeanza kwenda” Alisema Bw.Chafu.

IGP Ernest Mangu alitumia ziara hiyo kuzungumza na Mkuu wa Wilaya ya Kiteto, kamati ya ulinzi na usalama ya wilaya, Wakaguzi wa Tarafa pamoja na Askari Kata ili kutafuta ufumbuzi wa migogoro hiyo na kuimarisha hali ya ulinzi na usalama.

(Picha na habari kwa hisani ya Fullshangweblog.com)

Sikinde, Khadija Kopa jukwaani Nov.29

NA MWANDISHI WETU

MALKIA wa mipasho Tanzania, Khadija Kopa  na Bendi ya Sikinde ‘Ngpma ya Ukae’ wanatarajia kupanda kwenye jukwaa moja katika tamasha la sanaa na ubunifu la Mswahili maarufu kama Swahili Arts & Creative Carnival 2014, litakalofanyika Novemba 29 mwaka huu, kwenye Viwanja vya Posta Kinjitonyama jijini Dar es Salaam. 

Akizungumza jijini Dar es Salaam, Mratibu wa tamasha hilo, Ahadi Kakore amesema kuwa wameongeza bendi hiyo pamoja na Khadija Kopa kutokana na uwezo wao katika kazi na pia wamefanikiwa kuupeleka muziki wa Tanzania mbele.

“Maandalizi yanakwenda vizuri kwa sehemu kubwa hivyo niwaambie wapenzi wa burudani kwamba tamasha lao kwa ajili yao limeshawafikia.

“Pamoja na uwepo wa burudani ya muziki lakini  burudani nyingine zitakazopamba ni ni maonyesho ya filamu za Kiswahili, vyakula, maonyesho ya mavazi, nyama choma, vinywaji pamoja na michezo ya watoto huku tamasha likitarajiwa kuanza saa 5:00 asubuhi hadi usiku wa manane na watu 500 wa kwanza watapata zawadi langoni,” alisema Kakore.

Tamasha hilo limeandaliwa na Kampuni ya Swahili Arts & Creative Carnival kwa kushirikiana na Hildelly Solution na Wazalendo Bright Media kwa udhamini wa Amo Transport Solutions, Coca Cola, Tigo, Oriflem, Chibuku, Global Publishers, CTN na Sibuka TV.

sera ya elimu kufutwa

Serikali imesema wakati wowote kuanzia sasa, itaifuta sera ya elimu inayotumika nchini kutokana na kukamilika kwa mchakato wa uanzishwaji sera mpya ambayo imepangwa kuzinduliwa na Rais Jakaya Kikwete, mwezi huu.

Katibu Mkuu wa Wizara ya Elimu na Mafunzo ya Ufundi, Profesa Sifuni Mchome, alisema sera hiyo tayari imepitishwa baada ya kujadiliwa na vikao vya Baraza la Mawaziri.

Akizungumza jana katika uzinduzi wa Chuo Kikuu kipya cha  Mwenge (MWECAU) kinachomilikiwa na Kanisa Katoliki kilichopo nje kidogo ya mji wa Moshi, Profesa Mchome alisema uamuzi huo wa Wizara hiyo umelenga kuhakikisha kwamba sekta hiyo inakua na kukidhi mahitaji na matarajio ya jamii ndani na nje ya nchi.

“Tumeanza kuboresha elimu yetu kwa kuangalia eneo la mifumo ya kisera na kimsingi, tumefumua sera inayotumika. Huko tumeangalia mwelekeo wa sasa wa dunia inavyokwenda, mabadiliko ya sayansi na teknolojia, viwango na vigezo vya ubora wa elimu inayotolewa,” alisema.

Alisema mambo mengine yaliyohakikiwa wakati wa uandaaji wa sera mpya ni njia za kuwapata wahitimu wenye elimu bora na yenye viwango ambavyo vimebainishwa na kuwekwa kisera ili kuepusha mambo ya kufikiri au kubuni.

Aliyataja mengine yaliyoangaliwa na kuchambuliwa na jopo la wasomi kuwa ni namna taifa litakavyosimamia elimu yake kwa ufanisi katika ngazi za chini, wilaya mikoa na Taifa.

”Jambo jingine lililoangaliwa kisera ni namna tutakavyoiweka mitaala ya elimu iweze kutufikisha kwenye malengo ambayo ifikapo mwaka 2025 Tanzania itakuwa ni taifa lililosheheni watu

wa kipato cha kati ambacho kina wananchi wanaofahamu, wenye elimu, ujuzi, uwezo wa kupambanua na kuzikabili changamoto za maisha na ajira,” alisema.

Hata hivyo, Askofu wa Jimbo Katoliki la Moshi, Isack Amani, akizungumza kwenye mahafali ya saba ya chuo hicho, alisema sekta ya elimu inahitaji mabadiliko makubwa kwa kuwa baadhi ya wasomi na wanafunzi hivi sasa wengi wao hawamudu kutekeleza majukumu yao kutokana na kutegemea akili zao zisukumwe na nguvu ya kilevi.

Chuo Kikuu cha Mwenge kimepandishwa hadhi kuwa Chuo Kikuu baada ya kujiengua katika mwavuli wa vyuo vingine 12 vishiriki vya Chuo Kikuu cha Mtakatifu Augustino (SAUT)

CHANZO chingaone.com

Usemavyo ubongo wa Kakore

Hawa wametolewa kafara, tatizo lipo Simba

HIVI karibuni klabu ya Simba ilitangaza kuwasimamisha wachezaji wake watatu kwenye kikosi hicho ambao ni Haruna Chanongo, Shaaban Kisiga na Amri Kiemba kwa kile kilichoelezwa kuwa ni utovu wa nidhamu.

Lakini hapa najiuliza maswali mengi kuwa ni kweli tatizo la Simba ni Kiemba, Kisiga na Chanongo, Kocha Patrick Phiri na wasaidizi wake? Au kuna matatizo mengine makubwa zaidi ya haya tunayoyaona yakitokea sasa.

Lakini majibu ni mepesi ambayo hayahitaji hata elimu ya darasa la saba kujua ukweli wa mambo kwamba tatizo la Simba ni kubwa zaidi ya Kiemba na wenzake ambao mimi naamini kuwa wametolewa kafara huku matatizo ya msingi yakiachwa.

Ukiangalia Simba ilivyo sasa ina mpasuko na mgogoro uliotokana na makovu ya uchaguzi ambayo yalipelekea wanachama zaidi ya 60 kufukuzwa uanachama wao kwa kosa la kufungua kesi mahakamani wakati wa uchaguzi uliofanyika yapata siku 100 zilizopita.

Hii ni moja ya sababu kubwa ambayo inaifanya Simba ipepesuke kwenye ligi kwani ukweli uliopo ni kwamba kama klabu ikiwa haina umoja na amani ni ngumu kupata matokeo bora, jambo hili ndilo linaikumba Simba kwa sasa hivyo kuwaondoa kikosini wachezaji hawa ni tatizo lingine linaloendelea kutengenezwa katika timu badala ya kutatua.

Naamini kwamba, baada ya kuwafukuza au kuwaondoa kikosini Kiemba na wenzake, bado ndani ya timu hapawezi kuwa na utulivu kwani wapo wachezaji ambao wanaweza kucheza kwa hofu kwa kuamini kuwa nao wanaweza kufukuzwa jambo ambalo litawafanya kucheza chini ya kiwango.

Lakini jambo la pili ni kukosekana kwa mshikamano na sauti moja ambayo inaifanya Simba kuwa moja kama ambavyo kauli mbiu yake inavyosema ‘Nguvu Moja’, hii ni kutokana na mpasuko ambao niliueleza hapo awali.

Kwa maana hiyo ili kuwa na Simba imara, ni lazima kuhakikisha inawarejesha Wanasimba kwenye nyumba moja kwa njia ya kukusanya makundi yote na kuwa kwenye njia rahisi ya kuelekea kwenye mafanikio.

Juu ya jambo hili lazima uongozi wa Simba ukae na kufikiria namna bora ya kufanya ili Simba kuwa moja vinginevyo hayawezi kupatikana matokeo bora ndani ya timu hiyo kwa wakati huu. Nakumbuka nilishasema miezi kadhaa iliyopita kuwa suala la mpasuko na mgogoro ndani ya Simba linaweza kusababisha matatizo makubwa kwa wakati huo na wakati ujao ambao ndiyo haya tunayoyaona sasa.

Jambo la tatu ambalo ni miongoni mwa mambo nyeti ni ukosefu wa stamina kikosini, ambapo timu imekuwa ikichoka mapema ndiyo maana yenyewe imekuwa ikicheza muda wa dakika 45-60 pekee hivyo zinazobakia wapinzani wao wanakuwa wakimiliki mpira.

Kwa hali hiyo imefanya hata kama Simba inapata ushindi lakini inakwama kuulinda ushindi huo na matokeo yake kuruhusu mabao rahisi na wakati mwingine ni tofauti na jinsi ilivyopata mabao yake.

Haya ni mambo ambayo Simba inastahili kuyaangalia na kuyatolea maamuzi wakati huu kutokana na unyeti wake kwani tatizo la kiufundi linaonekana ingawa naamini linatokana na mambo nje ya dawati la ufundi.

Ninachokifahamu ni kwamba, iwapo Simba inahitaji matokeo bora ni lazima iangalie katika nyanja mbalimbali na si kuwafukuza wachezaji au kumfukuza kocha kwani naye taarifa zilizopo ni kwamba amepewa mechi tatu akishindwa kufanikiwa safari itakuwa imemkuta.

Ila naamini kocha akishafukuzwa wapo viongozi nao wanastahili kujiuzulu kwa manufaa ya klabu kwasababu kama wameshindwa kuongoza ni vizuri wakaachia Wanasimba wengine waweze kuongoza kwani huenda wakawa na mbinu mbadala za kuifanya Simba kupata ushindi.

Kwa mfano katika mchezo baina ya Simba na Caostal Union kwenye Uwanja wa Taifa, Simba ilitangulia kufunga lakini ikashindwa kuulinda ushindi wake na kujikuta inaambulia sare, mwenendo ambao umekuwa ukiendelea hivyo hivyo hadi sasa.

Ndiyo maana nasema kuwa tatizo la Simba si Kisiga, Chanongo wala Kiemba ila kuna matatizo mengine mengi ndani ya timu ambayo yameifanya Simba kushindwa kuwa bora ambapo moja ya sababu hizo ni kuwepo kwa mgawanyiko miongoni mwa wachezaji.

Kwa sasa ndani ya timu moja kuna wachezaji ambao wanaonekana ni bora na muhimu kuliko wengine, jambo hilo nalo linatajwa kuchangia Simba kushindwa kufanya vizuri hivyo lazima uongozi uchukue hatua ya kurekebisha matatizo hayo badala ya uamuzi wa huwatuhumu wachezaji hawa wanaijuhumu timu.

Kwa sasa Simba ipo katika nafasi ya 10 baada ya kucheza mechi tano, ikitoa sare mechi tano, ikifungwa mabao matano na ikiwa na pointi tano, lakini hadi sasa haijafungwa takwimu ambazo mimi naamini si mbaya ila nafasi iliyopo ndiyo mbaya ingawa kama matatizo niliyoyataja yakirekebishwa, inaweza kuisaidia timu hiyo kufanikiwa.

Mazingira ya sasa yanastahili kufanyiwa maamuzi ya busara ili kufanikiwa vinginevyo uongozi unaweza kuingia kwenye historia mbaya ya timu kushuka daraja ikiwa mikononi mwao jambo ambalo litakuwa ni la aibu ya mwaka ambayo haijaweza kumkuta kiongozi yeyote kwenye klabu hiyo kwa zaidi ya miaka 70.